حديث الجارة ــ (تنظيف السجاد)
س - مسا الخير يا جارتي
ج - يسعد مساك يا ام صباح . وين هالغيبه كل ما إتطلّع لصوب بيتكم وشوف الشبابيك مسكّرة بنحصر . دخلك كيف صارت بنت حماك ؟
س - الحمد الله صارت احسن بكثير ، لكن بعدها ضعيفه ما بتقدر تقوم من فرشتا . وحماتي ضلّت عندا . وانا جبت حتى ضب السجاد وعلى عجلَه نسيت كيف علمتني حماتي تأميل ... دخْلك يا جاره قوليلي كيف بعملو ، لان صار وقتو ، وبدي إخلص منو قبل ما ترجع حماتي ونطلع للجبل .
ج - تكرمي يا ام صباح ، شوفي ، بكره عبكرا غدي بكثير وطلّعيه عالسطح وانشريه على قفاه ، والظهر اقليه حتى ينشف منيح . وبعدان افلشي السجادة على الارض ، وجها لتحت ، واضربيها بمضربة السجاد - واذا ما عندك واحده لعيرك مضربتنا -
س - مبَلا ، عنا مضربة سجاد . كتّر خيرك .
ج - طيب لكان . اضربي السجادة وشبّعيا ضرب ، وبعدان خلي حدا يساعدك رديا شوي واكنسي الغبرة من تحتها وشوفي شو يطلع تراب ، وضلي عملي هيْك حتى ما يعود يطلع منها شي .
س - دخْلك يا جارتي ، بزكر امي كانت تفلش السجادة على الحيْط وتضربها .
ج - وامي كمان كانت تعمل هيك ، ولهلَّق بعد في كثير ناس بيفلشوا سجادهم على الحيط لكن هالطريقة بتقصّر عمر السجاد .
س - وبعدان ؟ بضبّنْ ؟
ج - طولي بالك يا جارة ، بكثير على الضب . بعدان افتحي السجاده على وجها وبلي شقفة قماش من الكاز وامسحي وجه السجادة منيح ، لان الكاز بنظف كل البراقيح والاوساخ وبيعطي السجاده لمعه ورونق . حتى ان الانكليز ببلّوا جرايد بالكاز وبيفلشوها على طول السجاد ويضبّروه للسنة الثانية .
س - وبطّني بلفّوه لف ، مش هيك يا جارة ؟
ج - مبَلا ، لان الطوي بعرّض الاطراف المطوية للهربات وبيعطي السجادة كسرات بشعة . والمهم كمان ان تحطيهم في مطرح مهوي وعالي عن الارض احسن ما يلحقهم رطوبة ...
س - دخْلك ما قلتيلي شي عن النفتالين ؟
ج - لازم كمان تحطي نفتالين او د . د . ت . لقتل العت والحشرات ... وكمان ستاتنا القدم كانوا يستعملوا ورق الزنزلخت - هيدا قبل ما اكتشفوا النفتالين والد . د . ت . هلي افتك من غيرو بالعت وباقي الحشرات .
س - ويا جاره ، دخْلك ، عندي سجادة أوضة الصفرة موسّخة كتير ، يا ما كبّوا علَيْا اولاد بنت حماي شوربا
وحليب . وكان بفكري اغسلها بماي وصابون . شو قولك بصيرلا شي ؟
ج - اذا كانت سجادة عجمية كاشانية او من الانواع المنيحة القديمة فاحسن شيء إلها ، الغسيل بالماي والصابون البلدي ، وبتشوفي كيف بتفرفح وبيزهي لونا . لكن اذا كانت سجادة اوضتك الصفرة من السجاد الفرنجي الجديد ، فاياكِ ان تغسليها وتعرّضيا للشمس لمدة طويلة ، احسن ما تفقد زهوة ألوانا ، واكتفي بمسحها مليح بالكاز ، لان الكاز بالفعل بينضّف كتير مليح .
س - متشكره كتير يا جارة ... رحْ أعمل مثل ما قلتيلي تمام . خليني إتعلم شي جديد ما زال وحدي بالبيت ، لان لو كانت حماتي هوْن ، مستحيل تخليني اعمل الا مثل ما علّمتنا ستّا . وكان بدو يصير محاججي ، تنتهي بتقهره . ودخْلك قلبي اهترى من المحاججة . ويا ريت شي بيقتنعا ! بدَّا تضل تعمل مثل ما علمتنا ستّا وها العصر صار فيه اشيا كثيره واختراعات .. مثلاً كل ما قال ابنها تا نجيب مكنسه عالكهربا بتقوم قيامتا عليّ : انت علمتيه لجوزك ! وقديش بحلّفلا إني ما علّمتو ما بتصدق ، حتى ترجيتو ما يفتح سيرة الكهربا بعد قدّاما ...
ج - بسيطة يا ام صباح ، انت عقلك واسع طولي بالك عليا ! وخلّينا نشوفك .
س - تضلي بخير يا جارتي ، وكتّر خيرك .
ج - مع السلامة يا ام صباح .
