شعر
جيران
قصيدة انسانية من «دولاب» للشاعر
يصدر قريباً عن «دار الكتاب»
يصدر قريباً عن «دار الكتاب»
نساتنا بيصيّفو بجرودكن
وبتسرّحو جديّاتكن بغابنا
ونحلاتنا بيتغامزو ع ورودكن
وعمنشرن، ع فرد شمس، ثيابنا
ورغيفنا منقمّرو، ع صاجكن
وتحطّبو وبضحكاتكن ريحاناتا
وطفلنا يطعمي العشا لدجاجكن
وبنتكن تسقي الهنا صيصاناتا
وبروموش عينينا نلملم دمعكن
وإنتو تدفّو عيونكن بخدودنا
وزرعنا الأخضر ع ميّة نبعكن
وجدودكن اصحاب هنّ وجدودنا
وع فجرنا بتلوّحو عنقودكن
ومعتّقين نبيدكن بجرارنا
وغياتنا فيّو فوق قرميدكن
وياسمينتكن ع فسحة دارنا
وعمنضوّي سراجنا من زيتكن
وشقيقكن طالع حوالا صخورنا
وشحرورنا معشّش بطاقة بيتكن
وتكتك حجلكن، جاوبو شحرورنا